Алматыда жастарға жалға берілетін пәтерге өтінім беру 11 желтоқсанда басталады.

35 жасқа дейінгі қала тұрғындарына Наурызбай ауданынан 2000 пәтер беріледі.

11-15 желтоқсанда Алматыда жалға берілетін пәтерлерге (бұлар сатылмайды) өтінімдер қабылданады. Бұл туралы қалалық әкімшілік хабарлады.

Өтінімдер Kezekte.kz сайты арқылы қабылданады. Оған Халыққа қызмет көрсету орталығынан ЭЦП арқылы тіркелуге болады.

Өтінім иесінің орта білімі, қалада кемінде үш жыл тұрақты тіркеуі болуы керек.

Оның он төрт жастан асқан балалары болса, олардың да қалалық тіркеуде тұрғаны жөн. Отбасының атында соңғы бес жылда жылжымайтын мүлік, сатып алу/сату құқығынсыз жалға алынған пәтер болмауға тиіс.

Айлық табысы 40 АЕК немесе 138 мың теңге көлемінде болуы керек. Бұған қоса, өтінім иесінде банктік жинақ шоты болуға тиіс.

Қатысушыларды іріктеу балл арқылы есептеледі. Балл белгілеу критерийлері мен құжат тізімі сайтта жазылған. Өтініш бергендер нәтижесін жеке кабинет арқылы бақылай алады,

дейді қалалық әкімшілік өкілдері.