Қаза тапқан 13 адамның 8-і Пәкістан азаматтары болған. Олар Асфендияров атындағы медунивердің студенттері. Қаза тапқандар 25-30 жастағы адамдар.
2 адам ауруханаға жеткізілген.
Хостелдің ашылғанына 1,5 ай болған. Және мұндай қызметпен шұғылдануға рұқсаты болмаған.
Алматы қалалық Төтенше жағдайлар департаментінің мәліметінше, 30 қараша күні сағат 05:33-те Әди Шәріпов көшесіндегі өрт туралы хабарлама түсті.
Бірінші өрт сөндіру бөлімі шақырту орнына 7 минут ішінде келді. Келген бойда 1 қабаты және жертөлесі жатақханаға айналған 3 қабатты тұрғын үйдің жанып жатқаны анықталды.
Алдын ала ақпарат бойынша өрттің жалпы ауданы – 30 шаршы метр. Өрт 06:22-де жойылды.
Алдын ала ақпаратқа сәйкес хостелде 72 адам болған. Оның 59-ы өрт сөндірушілер келгенге дейін сыртқа шығып үлгерген. Өртті сөндіру барысында 13 адамның денесі табылды. Олар көміртегі тотығынан уланып қайтыс болған.
Өрт болған жерге Алматы қаласы ТЖД 46 адам және 13 бірлік техника жұмылдырылды. ТЖД өрт пен қаза болудың себебі анықталып жатқанын, ақпарат түсуіне қарай толықтырылатынын мәлімдеді.
