Парламент Мәжілісінің қазіргі құрамы 16 қаңтарда таратылуы мүмкін. Қазіргі депутаттардың жұмысына алматылықтардың көңілі тола ма? Олардың сүйікті депутаты кім? Qaz365.kz қала тұрғындарынан сұрап көріпті.
Сауалнама қатысқан тұрғындар депутаттардың атын атай алмады, сондай-ақ олардың жұмысына көңілі толмайтынын айтады. Олардың көбі халыққа ең жас депутат ретінде танылған Мәди Ахметовтің білетінін айтты.
Депутаттардың жұмысы қанағаттанарлық емес. Ең жас депутат Мәди Ахметовті танимын. Оны үздік деп айта алмаймын, көп сынға алынғаны үшін ғана танимын.
Олар жұмыстарының нәтижесін көрсеткен жоқ. Теледидарда, сессияларда айтатындарын айтады, іс жүзінде атқарғаны шамалы.
Алматылықтардың арасында жаңа депутаттар сайланса да, елімізде ештеңе өзгермейді деп санайтындар да бар.
Ештеңе өзгермейді ғой. Сол баяғы саясат. Жаңа Қазақстан дегенмен, отырған кісілердің бәрі ескі Қазақстанның адамдары. Жақсы депутаттар бізде ілуде бір. Сондай деп Қазыбек Исаны айтсақ болады.
Ал кейбір қала тұрғындары қазіргі депутаттарға қарағанда бұрынғы депутаттардың жақсы жұмыс атқарғанын атап өтті.
Бұрынғы депутаттардай қазір депутат жоқ. Бұрындары Айталы Амангелді секілді ұлтқа жаны ашитын депутаттар болды. Қазіргі депутаттарды білмеймін.
Депутаттар қазақтың мүддесіне жұмыс істеуі қажет. Халық соны күтеді. Баяғы Ғани Мұратбаев секілді қайраткерлер керек. Қазақ халқы қазір соған зәру болып тұр. Қайраткерлер жоқ деп құр шөппен ауыз сыпыруға болмайды. Бар. Бірақ олар көбейіп, бірігіп, халықтың өтінішін жеткізсе, нәтиже береді.
