Қарағанды облысында «Арселор Миттал Теміртау» АҚ-на тиесілі Ленин атындағы шахтада газ дренажды ұңғымаларды бұрғылау кезінде жарылыс болды.
ТЖ министрлігінің ресми өкілі Руслан Иманқұловтың мәліметінше, төрт адам қаза тауып, тағы төртеуі ауруханаға жатқызылды. Тағы бір кенші іс-түссіз жоғалып кетті.
Алайда, біздің дереккөзіміздің мәліметіне сай, 5-ші кеншінің мәйіті табылды.
Зардап шеккен кеншілердің екеуі Шахтинск орталық ауруханасының реанимациясына, екеуі токсилогиялық бөлімшесіне жатқызылды. Ең үлкені-68 жаста болса, ең кішісі — 34-те. Олар орта және ауыр дәрежедегі жарақаттармен түскен. Сондай-ақ метанмен уланған.
Біздің ақпаратқа сәйкес, зардап шеккендерге санавиация желісі арқылы нейрохирург, реаниматолог және токсиколог мамандары жіберілді. Екі жәбірленушіні тасымалдауға дайындап, Қарағандыдағы Мақажанов атындағы көпсалалы аурухананың токсикологиялық бөлімшесіне ауыстырды.
Еске салайық, 3 қарашада таңғы сағат 3.00 шамасында Шахтинск қаласындағы Ленин атындағы шахтада жарылыс болды.
