Ақмола облысының еріктілері сатып алушы болып, астаналық дәмханаларды етпен қамтамасыз ететін ит аулаушымен сөйлескен. Олар полиция қызметкерлерімен бірге ер адамды ұстады, деп хабарлайды Massaget.kz тілшісі Instagram желісіндегі Inucobo_kz парақшасына сілтеме жасап.

Ер адам тендерге сәйкес 18 ауданы бар екенін және одан ит қашпайтынын айтады. Сондай-ақ, ит аулаушы қаланың жартысын етпен қамтамасыз ететінін айтып, қызметін жарнамалаған. 

Біз үлкен көлемде ит етін сататын ер адаммен байланысқа шықтық. Сатып алушылар атын жамылып, бұл адамдардың Ақмола облысынан екенін анықтадық. Ол ешкімнен қорықпайтыны сонша, шағын партия ет сатпайтынын айтып мақтанды. Етте чип пен оқ болуы мүмкін, сондықтан мұқият пісіріңіздер дейді. Еріктілер мен полиция қызметкерлері қаскөйді ұстады, одан қару-жарақ пен 750 келі ит еті тәркіленді,

делінген хабарламада.

Экология және табиғи ресурстар министрі Зульфия Сүлейменова Астанадағы мекемелерде ит еті сатылған оқиғаға қатысты пікір білдірді.

Иттерге қатысты мәселені қарастырып жатырмыз. Санитария-эпидемиологиялық бақылау тарапынан тексеру жүргізілуі қажет. Екінші мәселе заңнаманы бұзу дерегіне қатысты ІІМ тарапынан шаралар күтіліп отыр. Біз осы заңды әзірлеген уәкілетті орган ретінде («Жануарларға жауапкершілікпен қарау туралы» заң — еск.) кеше ғана бұл мәселені талқыладық. Жақын арада ІІМ-мен де, Денсаулық сақтау министрлігімен де одан әрі шаралар қабылдау бойынша байланысамыз деп ойлаймын,

деді министр Үкімет кулуарында журналистердің сұрақтарына жауап бере отырып.