Қызметке билікке тәліптер келгенге дейін жұмыс істеген әйелдер тартылды. 100-ге жуық әйел оқудан өтіп жатыр. Бұл туралы «Азаттық» радиосының ауған қызметі хабарлады.
Құқық қорғаушылардың айтуынша, тәліптер мұны әйелдердің наразылығын, елдегі митингіні басу үшін жасап отыр.
Билік әзірге полицей әйелдердің міндеттерін айтпады, бірақ әйелдер ауған полициясы шерулерді тарату кезінде қолданатын қалқандармен және дулығалармен жабдықталған.
Тәліптер билікке келгеннен кейін әйелдердің құқығын сақтауға уәде берді, бірақ көп ұзамай шектеулер қоя бастады. Олар 20 жыл бұрынғы әйелдер істері министрлігін жойды, қыздардың мектепте білім алуына шектеу қойды, әйелдерге спортпен айналысуға тыйым салды, тележүргізушілерге хиджаб киюге міндеттеді. Мамырда тәліптер әйелдерге орынсыз көшеге шықпауды және көпшілік алдында беттерін паранжамен жабуды бұйырған болатын.
