Ішкі істер министрлігі құқыққа қайшы іс-әрекеттер жасайтын полиция қызметкерлерін анықтау шараларын қабылдауда. Дәлірек айтқанда, ІІМ-нің Өзіндік қауіпсіздік департаменті еліміздің 7 өңірінде жақын шет елдерден әкелінген көлік құралдарын Қазақстан Республикасында заңсыз есепке қою бойынша қылмыстық істерді тергеуде.
Ведомствода атап өткендей, соңғы үш жылда 2 мыңнан астам көлік құралы заңсыз тіркелген, мемлекетке келтірілген залал 10 млрд теңгеден асты.
Жуырда ІІМ орталық аппаратының қызметкерлері Шымкент қаласындағы жақын шетелдерден кедендік төлемдерді, кәдеге жарату алымын және мемлекеттік бажды төлемей әкелінген көлік құралдарын заңсыз есепке қою схемасының жолын кесті. Қалалық полиция департаментінің Процессинг орталығының екі қызметкері соттың санкциясымен қамауға алынды.
Шымкентте қазақстандық есепке заңсыз қойылған 53 автокөлік бойынша мемлекетке 320 млн теңгеден астам сомаға залал келтірілді. Қылмыстық топқа процессингтік орталық қызметкерлеріне жақын делдалдар, сондай-ақ ХҚКО-дағы «көмекшілер» деп аталатындар және жалған сенімхаттар жазып берген нотариустар кірген. Қылмыстық схемаға қатысушылардың қылмыстық қудалау орбитасындағы рөлі мен орны тергеу шаралары барысында анықталады,
делінеді ІІМ хабарламасында.
