Черногорияның солтүстігіндегі Брезна деген курортта «Ең жалқау адам» атағы үшін сайысып жатқандардың жантайып жатқанына бес аптадай болып қалды.

Жарыстың ережесі қиын емес: кім бір жерде орнынан тұрмай бәрінен ұзақ жатып алады, сол жалқаулар арасындағы чемпион атанады.

Жарыс басталғанда 21 адам жантайған.

Бес аптаның ішінде көбі шыдамай, тұрып кетіпті. Қазір 4 адам әлі жатыр, орнынан тапжылмай.

Жарыс ережелері мынадай:

• 8 сағатта бір рет 10 минутқа туалетке тұруға болады;
• Тұруға және отыруға болмайды;
• тамақ-суды жатқан күйі ішіп-жеу керек;
• сөйлесе беруге болады;
• гаджеттердің бәрін пайдалануға болады;
• кітап оқуға болады.

Жалқаулар жарысы бұл елде 2012 жылдан бері өткізіліп келеді. Ондағы идея – черногориялықтар жалқау деген стереотипті мазақ ету.

Биыл бұл жарыс халықаралық мәртебеге ие болды, жарысқа Сербиядан бір азамат келген екен.

Бас жүлде — 1 000 евро.