Қазақстан «бір Қытай» приниципін қолдайды. Бұл туралы Сырты істер министрінің баспасөз хатшысы Айбек Смадияров мәлімдеді.

Қазақстан Республикасы «бір Қытай» принципін қолдайды және Тайвань Қытай Халық Республикасы аумағының ажырамас бөлігі деп есептейді,

деді СІМ ресми өкілі.

Айбек Смадияров Қазақстан халықаралық құқықтың қолданыстағы нормалары мен Біріккен Ұлттар Ұйымының Жарғысын сақтауды жақтайтынын айтты. Атап айтқанда, бұл мәселеде Қазақстан Республикасы БҰҰ Бас Ассамблеясының №2758 (1971 жыл) қарарын ұстанады.

1949 жылы Қытай Республикасы Тайваньды басқаруды сақтап қалды. Ал Қытайдың қалған бөлігі Қытай Халық Республикасына айналды. 1971 жылғы қарарда Қытай атынан өкілдік ету құқығы Қытай Республикасынан Қытай Халық Республикасына берілді деп көрсетілген.

Мен шетел мемлекеттерінің ресми делегацияларының Тайваньға сапары Қытай Халық Республикасы үкіметімен келісілуі керек деп есептеймін,

деп қорытындылады Сыртқы істер министрлігінің ресми өкілі.

Еске салайық, 2 тамыз күні кешке Нэнси Пелоси мінген ұшақ Тайвань астанасы Тайбэйдегі Суншань әуе базасының әуежайына қонды. Ол делегацияның Тайваньға бару себебі АҚШ Тайваньға адалдығынан бас тартпайтынын және уақыт сынынан өткен достығын мақтан тұтатынын білдіру екенін айтты.