Қазақстанда 4 айдың ішінде адам саудасының 30-ға жуық фактісі тіркеліп, 3 қылмыстық топ анықталды. Бұл туралы ҚР Ішкі істер министрі Марат Ахметжанов хабарлады.
«БҰҰ мәліметіне сәйкес, әлемдегі адам саудасы құрбандарының 70 пайызы – әйелдер мен жас қыздар. Ал әрбір үшіншісі – балалар. Өкінішке қарай, бұл проблема Қазақстанда да бар»,
деді Марат Ахметжанов.
Министрдің айтуынша, қазір жыл сайын елде 100-ден астам осындай қылмыс тіркеледі.
«Бұрын 300-ге дейін жететін. Ал биыл төрт айда адам саудасына қатысты 30-ға жуық фактісі анықталып отыр. 3 ұйымдасқан қылмыстық топ ұсталды. Жалпы министрлікте ұйымдасқан қылмысқа қарсы күрес басқармасын қайта құрудың арқасында бұл қылмыстардың анықталу қарқыны артып келеді. Бірақ мойныдау керек, бұл тек салдарымен ғана күрес»,
деді Ішкі істер министрі.
Марат Ахметжановтың сөзінше, бүгінде адам саудасымен айналысатынлар халықаралық шараларға шақыру желеуімен балаларды елден алып кетіп жатыр.
Осы орайда, ІІМ Қазақстанда балалар да адам саудасының құрбаны болатынын айтты. Енді балалар саудасына қарсы күресу мақсатында16 жасқа толмаған азаматтардың Қазақстаннан кету тәртібі өзгереді. Еске салсақ, 21 қазанда Астанада «Қазақстан Республикасында адам саудасына қарсы іс-қимыл туралы» заң жобасын әзірлеу жөніндегі ведомствоаралық жұмыс тобының екінші отырысы өткен болатын. Заң жобасын енгізу мерзімдері: 2023 жылғы қаңтар – Әділет министрлігіне, 2023 жылғы ақпан – Үкіметке, ал 2023 жылғы сәуір – Парламентке енгізу белгіленді. Қазір адам саудасына қарсы іс-қимыл туралы заң жобасы талқыланып жатыр.
