Денсаулық сақтау министрлігі Атырауда нәрестеге хиджама жасаған орталыққа қатысты тексерістің нәтижесін жариялады, деп хабарлайды Sputnik Қазақстан тілшісі.

Медициналық және фармацевтикалық бақылау комитеті төрағасының міндетін атқарушы Лаура Ахметниязованың айтуынша, хиджама орталығында заңсыз медициналық қызмет көрсету фактісі анықталды.

Хиджаманың медбике жасаған. Оның тиісті лицензиясы да, клиникалық қызметке рұқсат беретін куәлігі де болмаған. Тексерістің нәтижесі бойынша айыппұл салынды. Қазіргі кезде барлық материал прокуратураға және полиция департаментіне жіберілді. Сондай-ақ, біз ол материалдарды ювеналды полицияға беруді жоспарлап отырмыз,

деді Ахметниязова орталық коммуникациялар қызметінде өткен брифингте.

Оның айтуынша, дәстүрлі емес медицинаның кейбір қызметтеріне рұқсат бар. Бірақ хиджама ол тізімге кірмейді. Қазақстанда оған лицензия берілмейді. Сол себепті орталыққа медициналық қызметі үшін айыппұл салынды. Қазір комитет аймақтық департаментпен бірге сотқа арыз түсіруге дайындалып жатыр.

Біз орталықтың дәл осы қызметіне тыйым салуды талап етеміз,

деп атап көрсетті Ахметниязова.

Айта кетері, қаңтардың соңында әлеуметтік желіде нәрестеге хиджама жасаған видео тарады. Әлеуметтік желіде сәбидің өміріне алаңдаған халық шулап кетті. Денсаулық сақтау министрі Ажар Ғиният да осы оқиғаға қатысты пікір білдірді.