Forbes Kazakhstan журналы елдегі ең ықпалды 50 бизнесменнің жыл сайынғы рейтингін жариялады. Бұл туралы Stan.kz ақпарат агенттігі хабарлайды.

Рейтинг авторларының айтуынша, алғаш рет тізімді осы уақытқа дейін бірінші орынды иеленген Тимур Құлыбаев пен Болат Өтемұратов бастамаған.

Алғашқы рейтингтен бастап-ақ бірінші орынды Тимур Құлыбаев немесе Болат Өтемұратов иеленген еді. Он үшінші рет көшбасшылықты басқа біреу алды. Биыл бұл тізімді Kaspi.kz негізін қалаушы және ең ірі үш акционердің бірі 54 жастағы Вячеслав Ким бастады. Осыдан 13 жыл бұрын ол 15-ші орында болған,

деп жазды басылым.

Сондай-ақ жаңадан келген алты кәсіпкердің үздік 50-ке кіргені анықталды. Олардың арасында Еркін Тәтішевтің Kusto Group-тағы серіктесі, YPO Kazakhstan жаңа төрағасы болып сайланған және «Бәйге» ұлттық федерациясын басқарған 47 жастағы Қанат Көпбаев бар.

Сонымен қатар тізімде белгілі кәсіпкер Рашит Сәрсеновтің 38 жастағы ұлы Эльдар Сәрсенов бар. Оған бұрын әкесіне тиесілі болған «Нұрбанк» және «Виктория» сақтандыру компаниясының басым акциялары берілген.

Рейтингте алғаш рет 39 жастағы «Республика» парламенттік партиясының төрағасы, Мәжілістің VIII шақырылымының депутаты Айдарбек Қожаназаров шықты.

Құлыбаевтардың іскер серіктесі, олардың бизнес империясындағы көптеген ірі құрылымдардың басшысы 61 жастағы Раушан Сағдиева да биік белестерді бағындырды.