Ерлер мен әйелдер қарым-қатынасы ау бастан көтеріліп келе жатқан мәселе. Ортақ шешімі жоқ, пікірлер бір жерде тоғыспайтын өткір мәселені психотерапевт Жібек Жолдасова тағы да көтерді.

Жібек Жолдасова тұрмыстық зорлық-зомбылық, тізесі шығып бүгінде қажеттілігін жойған салт-дәстүрлер туралы мәселені үнемі көтереді. Себебі кейбір дәстүрлер жаңа қоғамның заңдылығына қайшы келеді. Әйелдер қауымы қолдады. Алайда арты тағы бір мәселенің ұшын шығарды. Қазақ жігіттері отбасын құруда қандай құндылықтарға сүйенеді?

Біздің қазақ жігіттері не үшін үйленеді? Жақсы жар табу үшін емес, отбасына тегін жұмыс күшін табу үшін бе? Қыздардың тағдырлары бір-біріне ұқсас. Күйеуі мен оның туыстарыалдында жаман кім? Әрине жаман келін бола шығады. Ата-анасын құрметтемейді-мыс. Ал оның қандай болу керектігін ешкім дөп басып айта алмайды.

Құрмет деген не? Жолдасыңның барлық туысының аяғына жығылуды құрмет дей ме? Бұдан бөлек, қыз бала келін болып түскеннен кейін жасамайтыны жоқ. Үш рет тамақ дайындайды, жұмыс істейді, бала тәрбиесімен айналысады, өз төркінін де ұмытпайды. Соған қарамастан жаман болып қала береді,

деді Жібек Жолдасова.

Маманның айтуынша, жігітке өзіне серік болатын, түсінетін, қолдайтын екінші сыңар қажет емес. Ол отбасының көңілінен шығуды ойлайды. Келін ең алдымен жігіттің ата-анасының үмітін ақтай білу керек. Бір сөзбен, проблемаларға белшесінен батқан отбасын өз мойнына арқалайтын тегін құл керек.

Қыз бала сүйгеніне емес, оның ата-анасына тұрмысқа шығу керек пе? Әлде жігіт әйелге емес, келінге үйлену керек пе?

деп сұрайды маман.

Түбі ажырасуға жеткенде, жігіттің айтатын сылтауы: «Ол жаман келін болды».