Қанды Қаңтар оқиғасы кезінде Алматыдағы 155/18 тергеу изоляторында азаптаудан көз жұмған Жасұлан Анафияевті өлтірді деп айыпталған 7 полиция қызметкеріне сот үкімі оқылды

7 маусымда Алмалы аудандық қылмыстық сотының судьясы Е. Үстелбаев сотталушылардың барлығын ҚР ҚК 146 бабы бойынша кінәлі деп танып, А.Елеубеков пен М.Шынжырбаевты – 10 жылға,  З.Ибрагимовті – 9 жылға, А.Азимбеков, Н.Торыбаев және Б.Жақыпбаевты – 8 жылға, А.Мирадиловті – 5 жылға бас бостандығынан айырып, жазаны қауіпсіздігі орташа мекемеде өтеу жазасын тағайындады.

Судья Е. Үстелбаев сотталушылардың барлығын полиция шенінен айырып, марқұм Жасұлан Анафияевтің туыстарына 20 миллион теңге моральдық шығын төлеуге міндеттеді.