Не қажылыққа бара алмайды, не ақшасын қайтара алмайды. Бұл туралы КТК арнасы хабарлады.
Қажылық пен умраға апаратын «Кәусар тревел» туристік компаниясына қатысты тергеу басталды. Шымкентте, Алматыда бір топ азамат аталмыш турфирма үстінен арызданған. Олардың айтуынша, басым бөлігінің Медина мен Мекке үшу мерзімі өтіп кеткен, енді ақшасын да кері қайтара алмай жүр. Оның үстіне компанияның да былығы көп екенін естіген.
Былтыр 73 жастағы Жасқайрат Әмірғалиев жұбайымен жұбын жазбағанына 45 жыл толыпты. Соның құрметіне ұл-қыздары 1миллион 200 мың теңгеге Умраға жолдама сатып әперген. Мерзім бойынша екеуі қазір киелі жерде болуы керек еді. Бірақ ақсақалдың турфирма кеңсесінің алдында айналшақтап жүргеніне бір аптаға жеткен.
Ақша да, жолдама да, қажылық та жоқ. Далада қалдық. Бастығы Медет Мекебай деген жігіт екен, 27 жаста. Сол кісінің өзіне жолықтым, айттым. «Ертең ақшаңыз түседі, болады». Сонымен әлі жүр. Миыма еш қондыра алмаймын. Себеп не? Бұлар енді Алланың жолында жүрген адамдар, сүттен ақ, судан таза деп есептейтін едім. Қазір енді көңілім қатты қалып отыр,
дейді Ақтөбе тұрғыны Жасқайрат Әмірғалиев.
Өздерінің айтуына қарағанда, «Кәусар тревел» турфирмасына алданғандар саны 300-ден асады. Әрқайсысы жолдаманы 500-600 мың теңгенің төңірегінде сатып алған. Бәріне бірдей осындай төленді деген бір жапырақ қағаз ғана ұстатқан.
Біз үш билет алғанбыз. Жолдас балам үшеу алды. Жалпы алты билет. Мен анама, жеңгеме, қызыма алғанмын. 23-і ұшу керек болған. 23 күні кеңсесіне келдік. Ол кісі: «10 миллион бар, соны таратам» деп айтты. Ақшасын қайтарсын дегендер ЖСН берсін деді. ЖСН бердік. ақшаны қайтармады.
дедәі алматылық тұрғын Елмұрат Бимұрзаев.
Даудың басы осыдан бір апта бұрын Шымкент қаласынан басталған. Онда дәл осы «Кәусар тревел» компаниясына алдандық деген жұрт ақшасын қайтарып беруді талап етіп кеңсесінде шу шығарған еді. Меккеге бармақшы болған бір топ алматылықтар алданғанын сол кезде бір-ақ түсінген. Ұшу мерзімі келмесе де, олар төлеген қомақты қаражатын қайтарып беруді талап етіп отыр. Арасында тіпті студенттер де бар.
Ақшамды қайтарып алуға келген болатынмын. Бірақ нәтиже жоқ. Медет деген компанияның басшысы үш күн бұрын уәде берген болатын. «28-і күні 100 пайыз ұшасыздар, бір күн бұрын визаны жібереміз, оның алдында билеттің суретін жібереміз, Алматыдан ұшасыздар» деген болатын. Нәтижесі осы, құралақан қалдырып, сан соқтырып кетті,
дейді студент Абзал Айтмолданов.
«Кәусар тревелдің» әлеуметтік желіде тұрған нөміріне қоңырау шалып көрдік. Өшірулі. Сөйтсе компания ешбір жерде тіркелмеген, не лицензиясы жоқ.
«Туристік қамқор» қорының төрағасы Инна Рейдің сөзінше, компанияға жүгінер алдында туристік кодты талап ету керек.
Аталмыш компанияға қатысты тергеуді бастады.
