Қырғызстанда Тәжікстанның қарумен басып кіруі кезінде азаматтардың қаза болуына байланысты 19 қыркүйек ұлттық аза тұту күні деп жарияланды. Бұл туралы АКИpress хабарлады.
Ұлттық аза тұту күнінде елдің барлық аумағында, шетелдегі дипломатиялық және консулдық мекемелер ғимаратында Қырғызстан Республикасының мемлекеттік туы төмен түсіріледі.
Мәдениет мекемелері мен телерадиокомпанияларға ойын-сауық шаралары мен хабар таратудан бас тартуға кеңес беріледі.
18 қыркүйек күнгі сағат 22:00-дегі шұғыл мәлімет бойынша, қаза болғандардың жалпы саны — 59 адам, оның ішінде балалар да бар. Зардап шеккендер саны – 144 адам. Бірқатар жаралы адам операция жасау үшін Бішкекке жеткізілді.
Қайтыс болғандардың алдын ала тізімін мына жерден көруге болады.
14 қыркүйекте қырғыз-тәжік шекарасында екі ел шекарашылары арасында қақтығыс басталды. 17 қыркүйекке дейін жағдай шиеленісіп тұрды. Тәжік тарапы шекара сызығында толық атысты тоқтату туралы келісімге қарамастан, атқылауды тоқтатпады.
136 мың 770 қырғыз азаматы үйін тастап қашуға мәжбүр болды. Олар эвакуацияланды.
