Қазақстан спортшысы Нора Джеруто жеңіл атлетикадан әлем чемпионатында 3000 метр қашықтыққа жүгіріп алтын алды. Vesti.kz атлетпен болған сұхбатты жариялады.

Әлем чемпионатында жеңіске жеткеніме аса қуаныштымын, шексіз бақыттымын! Жаңа отанымның туы астында жарысқа түсу мүмкіндігін күткен едім. Бүгін әлемдік біріншілікте Қазақстанға бірегей сыйлық жасағым келіп, өзімді көрсетуге тырыстым. Қолымнан келді деп ойлаймын,

деді Нора Джеруто.

Спортшы алтын алып қана қоймай, осы қашықтық бойынша әлем чемпионаты рекордын орнатты. Өзі бұл көрсеткішке қажырлы еңбекпен, ұзақ дайындықпен жеткенін айтады. Барлық команданың сенімі мен үмітін ақтағанына бек қуанышты.

Әуелі отбасым мен Қазақстанға маған сенгені үшін ерекше алғыс айтамын. Қазақстан тарапы маған үлкен қолдау білдіріп, кейінгі 5 жылда кедергілермен жүгіру техникасы мен әдісін үйретті. Бұл — осы қашықтықққа жүгірудегі аса маңызды дайындық кезеңдерінің бірі. Бүгінгі нәтиже — менің ғана емес, Қазақстанның да жеңісі. Қазақстандағы жеңіл атлетиканың ары қарай дамуы үшін бар білімімді, тәжірибем мен күшімді салуға дайынмын.

Нора Джеруто алдағы жоспарлары туралы айтып берді. Ол қазір өтіп жатқан Гауһар лиганың ең беделді кезеңіне дайындалып жатыр. Медаль аламын деп үміттенеді.

Өкінішке қарай, Азия ойындары болмайтын болды. Сол жерде еліміздің туын желбіретемін деп жоспарлап едім. Дегенмен алда көптеген жаңа старт күтіп тұр. Деңгейімді төмендетіп алмас үшін қолымнан келгеннің бәрін жасаймын,

деді спортшы.

Айта кетейік, Нора Джеруто 3000 метр қашықтықты 8:53,02 минутта жүгіріп өтті. Ол Қазақстан құрамасы атынан әлем чемпионаттарына 2022 жылдан бастап қатысуға рұқсат алған.