Желіде балалардың газдалған сусыннан жаппай уланып жатқаны туралы ақпарат тарады.

Хабарламада «Тархун» және «Ситро» газдалған сусындары ғана емес, сонымен қатар «M&M’S», «Milky way» шоколадтары, «Дюшес» және «Барбарис» кәмпиттері және басқа да бірқатар тағамдар қауіпті деп танылғаны айтылған.

Дегенмен Денсаулық сақтау министрлігі бұл мәліметті жоққа шығарды. 

ҚР ДСМ санитариялық-эпидемиологиялық бақылау комитеті әлеуметтік желілерде таралған азық-түлік өнімдері туралы ақпарат фейк деп танылып, шындыққа сәйкес келмейтінін хабарлайды. Сондықтан жалған ақпарат таратпауларыңызды сұраймыз, ресми ақпарат көздерінен алынған ақпаратты пайдалануға шақырамыз,

деп хабарлады ведомстводан.

Статистикаға сүйенсек, Қазақстанда 6-9 жас аралығындағы балалардың үштен бір бөлігі аптасына бір рет және одан да көп қант қосылған алкогольсіз сусындарды, ал 16,7% — ы күнделікті тұтынады.

Оларды тұтынудың ең басты қаупі – қанттың жоғары мөлшері. Қантты шамадан тыс тұтыну семіздік, қант диабеті және тіс кариесінің пайда болуына әсер етеді. Орташа алғанда, құрамында қант бар сусынның бір банкасында 40 грамм қант (шамамен 10 шай қасық асханалық қант) болуы мүмкін.

Кофеиннің үлкен дозасы жүректің ауыр проблемаларына әкеледі, ал оның көмірқышқыл газымен және қантпен үйлесуі асқазан мен бауыр үшін қауіпті. Тіпті сирек қолдану аритмия сияқты жүрек ауруларын тудыруы мүмкін.