«Дикий Арман» лақап атымен танымал Арман Жұмагелдиев қаңтар қырғыны кезінде Ұлттық қауіпсіздік комитетінің кураторының үйлестіруімен әрекет еткен. Бұл туралы бас прокурор Берік Асылов мәжілістің жалпы отырысында мәлімдеді.
Алматыда жүргізілген тергеу бойынша, Жұмагелдиевке («Дикий Арман») ерекше рөл жүктелген. Оның ҰҚК кураторының үйлестіруімен әрекет еткенін анықтадық. Ол тәртіпсіздіктер ұйымдастырып, жиналғандарды бақылауға алып, билікке бірыңғай ультиматум талаптар қою үшін «халық кеңесін» құруы керек болды,
деді бас прокурор Мәжілістің жалпы отырысында.
Прокурордың сөзінше, Дикий Арманға Алматы қаласы мәслихатының бұрынғы депутаты, Алматыдағы «Қазақстан» қонақүйіне ұйымдасқан түрде келген бандиттерді қаруландырған Махатов криминалдық тобының мүшесі көмектескен.
Алайда олар жаппай наразылық акциясын басқара алмады. Адамдар оларға ілеспеді. ҰҚК-нің бұрынғы төрағасы ұсталғаны туралы ақпарат алғаннан кейін, сенімді алиби құру мақсатында содырларға тонауға қарсы күрес деген желеумен қала тұрғындарына шабуыл жасау тапсырылды,
деді Берік Асылов.
Асыловтың айтуынша, осы мақсатты орындау үшін олар 6 қаңтарда Ritz Carlton және «Қазақстан» қонақүйлерінің тұрақтарында әр жерден кездейсоқ 24 азаматты ұрлап, ұрып-соғып, ұстаған.
Кейіннен олар қаланың шетіне жеткізіліп, түні бойы ҰҚК қызметкерлерінің қарулы күзетімен контейнерге орналастырған. Содан кейін олар әуежайға жеткізілді, онда бір адам — Өтепбаев азаптаудан қаза болды. Осы деректер бойынша тергеу аяқталды. Қазір танысу жүріп жатыр,
деді бас прокурор.
