Іш киіміне дейін тартып алған.
Ол «Жеке өмiрге қолсұқпау және дербес дерек пен оларды қорғау туралы заңнаманы бұзу» бабы бойынша айыпталып жатыр.
Танымал журналист Сандуғаш Дүйсенова тергеушілер оны «тыр жалаңаш шешіндірді» деп шағымын айтты. Ол өзін құқық қорғау органдары қызметкерлерінің қалай қорлағанын жайып салды, деп хабарлайды Azattyq ruhy ақпараттық агенттігі.
Жетісу облысының полициясы Сандуғаш Дүйсенованы 8 сағат изоляторда ұстаған.
Мені 11 тамыз күні тергеуші кешке 17:00-ге шақырған. Ойымда ештеңе жоқ, бара салдым. Үстімнен арыз түскенін айтып, тергеуші сұрақтары барын жеткізді. Арыз түсірген осыдан 1,5 жыл бұрын адам өлтіріп, қашып жүрген адам екен. Сол кезде қылмыскер туралы өзімнің Instagram парақшамда жазған едім. Егер бұл адам туралы ақпарат болып жатса, полицияға хабарласыңыздар деген сарындағы пост салғанмын. Кейін Қызылағашқа барып, видео түсіргенім бар. Қылмыскер қолында 2 жасар баласы бар адамды атқан. Бала да жараланған. Менің бар айыбым сол адамның жеке сәйкестендіру нөмірі жазылған қағазды салуым ғой. Енді түрмеде отырған адам Жетісу облысының прокурорының атына «жеке өміріме қол сұқты» деп арыз жазған,
дейді Сандуғаш Дүйсенова.
Оны полиция бөлімінде тергеуші тағылған айып ауыр екенін айтып, қамауға алған. Сандуғаш өз кезегінде ешқайда қашып кетпейтінін, ішімдік, есірткіге әуестігі жоқ екенін түсіндіргенімен, полициялар қамауға алған. Кейін тінту жасап, шешіндірген көрінеді.
Тергеушінің кабинетінде үлкен камера тұрған. Сол жерде шешіндірді. Бұл полиция департаменті басшысының қойылған камерасы болса керек. Облыстағы полиция басшысы – ер адам. Менің бала-шағам, немерелерім, күйеу балаларым бар. 55 жастағы әйелмін. Бірақ соған қарамастан, осылай шешіндіріп, қорлық көрсетті. Бұл видео басқа жаққа тарап кетпесіне кім кепіл? Ертең видео тараса, мына Сандуғаштың шешініп тастағаны несі деп біреу айтуы мүмкін ғой. Кейін наркологияға, сосын арақ ішкен-ішпегенін тексеретін бөлімге апарды. Іш киімдерімді тартып алды. Төстартқышсыз ер адамдардың алдында жүруіме тура келді. Масқара жағдай. Мен бірақ айтқандарының бәрін істедім. Қарсылық танытпадым. Намысқа тырыстым. Енді үйге келіп, осынша қорлық көргенім намысыма тиіп жатыр. Сөйтіп, уақытша ұстау изоляторына қамауға алды. Жігіттер ұялды ма, әйтеуір, дұрыс матрас, көрпе-төсегін берді. Ал түнгі 00:40-та үйіме жіберді,
дейді журналист.
Оның адвокаты Ильмира Назырова енді прокуратураға шағым түсіріп, сол күні толтырылған барлық протокол, құжаттарды сұратпақшы.
Айта кетейік, Сандуғаш Дүйсенова «Жеке өмiрге қолсұқпау және дербес дерек пен оларды қорғау туралы заңнаманы бұзу» (147-бап) бабы бойынша айыпталып жатыр. Ешқайда кетпеу туралы қолхатпен босап шыққан.
Полиция қызметкерлері қазақтың журналист қызын басқа адамдардың көзінше тыр жалаңаш етіп шешіндіріп видеоға түсіргені не сұмдық мынау енді? Намысымыз өлген тірі өліктер еліне айналыппыз біз. Әйтпесе кеудесінде сәулесі бар азаматтар үнсіз қалмас еді мына сұмдыққа.
деп жазды қоғам белсендісі.
