Цифрлық теңгенің бірден бір артықшылығы – ол интернетсіз жұмыс істей береді. Яғни, қалада да, дала да қолжетімді. Бұл туралы экономист Мақсат Халық Қазақстан қаржыгерлерінің XI конгресінде айтты, деп хабарлайды Kazinform.
Сарапшының сөзінше, цифрлық теңге есеп айырысудың үшінші түрі болады. Оны қолма-қол ақшамен де, қолма-қол ақшасыз да пайдалануға мүмкіндік бар.
Цифрлық теңге – уақытында енгізіліп жатыр. Өйткені, көрші алпауыт мемлекеттерде енгізілуде. Атап айтар болсам, Қытай мен Ресейде. Осы тұста біз де қалып қалмауымыз керек. Сондықтан да, дәл уақытында қолға алынды деп ойлаймын. Пайдалы тұстарына келер болсақ, ең алдымен көлеңкелі экономиканың үлесін азайтуға ықпал етеді. Себебі, бізде көлеңкелі экономика қолма-қол ақшамен жүріп жатыр. Ақша айналымы цифрланған сайын, экономикада қаржының мөлдірлігі, тазалығы сақталады. Мемлекеттік сатып алулар, цифрлық теңге арқылы жүзеге асатын болса, ашықтықты қамтамасыз ететін болады. Сондай-ақ мемлекетте арнайы төлем цифрлық теңге арқылы жасалады. Оның тиімді тұсы ақшаның талан-таражға кетпеуіне ықпал етпек. Киберқауіпсіздікке де әсер етеді,
дейді Мақсат Халық.
Айтуынша, цифрлық валютамен интернет-эквайринг мобильді қосымшасы арқылы пост-терминалдар мен QR-кодтарды қолдана отырып, төлем жасауға болады.
Тағы бір артықшылығы интернетсіз қолдануға болады. Яғни, қалада да, дала да қолжетімді. Күнделікті біз қолданып жүрген төлем жүйелерімен салыстырғанда цифрлық теңге интернет болмаса да, бір емес, бірнеше транзакцияны қатар жасауға мүмкіндік береді,
дейді ол.
Бұған дейін Қазақстан қаржыгерлер конгресінде «Цифрлық теңге» жобасы іске қосылғаны хабарланған болатын.
