Жарысқа жүзден астам спортшы қатысуға ниетті.
Демалыс күндері Қазақстанда драг-рейсингтің жаңа маусымы басталады.
Турнирдің Sokol Drag Wars аталатын бірінші кезеңі 30 сәуірде Алматы-Астана тас жолының 76-шақырымында өтеді.
Шабандоздар жетек түрі немесе қозғалтқыш қуатына емес, ширек мильді қанша уақытта еңсеретініне қарай бес класқа бөлініп, жарысқа түседі. Ең жәй жүретін көліктер категориясындағы стандарт автомобильдер мильдің төрттен бірін 13-14 секундта бағындыруы тиіс, ал Pro Unlim деп аталатын аса жылдам темір тұлпарлар 10 секундта 402 метр жүріп өтеді.
Қазақстанда тегін дүние жоқ болғалы қашан. Жарысты көру ақылы: трибунадағы орынға 5000 теңге төлейсіз (7 жасқа дейінгі балалар, мүмкіндігі шектеулі жандар мен зейнеткерлер тегін кіреді), ал техпаркке кіруге рұқсат беретін Gold билет алғыңыз келсе, 10 000 теңгеңізбен қоштасу керек (жас бойынша шектеу 8+).
Жарыс 30 сәуір күні 13:00-де басталады.
