2022 жылғы тоғыз айда елімізде 27 медиа өкілдеріне шабуыл жасалған, 26 рет қоқан-лоқы көрсетілген, 17 журналисті ұстаған. Бұл туралы «Әділ сөз» сөз бостандығын қорғау халықаралық қорының президенті Тамара Қалеева Алматыда өткен пресс-конференциясында мәлімдеді.

Сонымен бірге ол осы жылы журналист әйелдердің де қудалауға ұшырағанын айтты. Оған қоса 9 журналист тұтқындалған, бас бостандығынан айырылған немесе шектелген. 80 журналист «заң бұзды» деп айыпталған.

Қор басшысы Тамара Қалееваның айтуынша, Қазақстанның қылмыстық кодексіне полицияның редакцияны тінтуге, журналистердің материалдарын ордерсіз алуға тыйым салатын норма енгізу керек. Сот ордерді ауыр қылмыс жасалғанда немесе ауыр қылмыс жасады деп айыпталған адамды қорғауда қажет болса ғана беруі қажет.

Журналист дәрігер сияқты қателесуге құқылы. Ал бұл құқықты заңнамамызға енгізетін кез келді, яғни журналист қоғам мүддесі үшін адал әрекет етсе және бұл сотта дәлелденсе, оны жауапкершіліктен босату керек,

деді «Әділ сөз» қорының басшысы Тамара Қалеева.

Сонымен қатар ол еліміздегі журналистердің құқығы мен қауіпсіздігін қорғайтын ұлттық жоспар қажет екенін айтады. Құжат медиа қызметкерлері мен мемлекеттік органдардың мәселеге көзқарасын тоғыстыратын актіге айналуға тиіс.