Индустрия және инфрақұрылымдық даму министрі Қайырбек Өскенбаев үкімет отырысында елдегі жол сапасы нашар өңірлерді атады.

Биыл өңірлердегі автожолдар сапасы тексерілді.

Биыл жергілікті маңызы бар жолдардың сапасын бақылау кезінде 9 мыңға жуық сынама алынды. Оның 2,5 мыңы, яғни 28%-і талапқа сай емес,

деді Қайырбек Өскенбаев.

Министрліктің баспасөз қызметі жол сапасы бойынша талапқа сай келмейтін өңірлер тізімін жариялады:

• Шымкент — 71%;
• Маңғыстау облысы — 61%;
• Алматы — 56%
• Шығыс Қазақстан облысы — 49%;
• Батыс Қазақстан облысы — 43%;
• Түркістан — 40%.

Ескертулерге қарамастан, тапсырыс берушілер нысандарды пайдалануға қабылдап жатыр. Кейбір өңірде мұндай деректер бойынша қылмыстық істер қозғалды,

деді министр.

Министр қаржыландыруды тең бөлу мәселесі өзекті екенін де айтты. Кейбір өңір бұл талаптарды орындамайды.

Мемлекет басшысының тапсырмасына қарамастан, Батыс Қазақстан облысында жол жағдайы төмен. Былтыр жыл аяғында облыстағы жолдардың нормативтік жағдайы 39% болса, орташа республикалық көрсеткіші 80% болған. БҚО әкімдігі биыл 2,6 миллиард теңге бөлді. Бұл — жалпы бюджеттің 10%-і, ал қажет қаржының 30%-і,

деді Қайырбек Өскенбаев.