Елімізде мұғалімдер күні қарсаңында «Үздік педагог» байқауы басталады. Жеңімпаздарға 3 млн теңге көлемінде сыйақы беріледі. Бұл туралы Оқу-ағарту министрлігі хабарлады.
Былтырғы байқау қорытындысы бойынша елдің әр өңірінен 64 мұғалім 3 млн теңгеден алған еді.
Конкурсқа мектепке дейінгі, орта, техникалық және кәсіптік білім беру ұйымдарының штаттағы мұғалімдер қатыса алады. Байқаудың барлық кезеңі, нақтырақ айтқанда, қатысушыларды тіркеуден бастап республикалық кезеңнің қорытындысын шығаруға дейін толығымен цифрландырылған.
Байқауға құжаттарды 12 қыркүйектен бастап 22 қыркүйекке дейін қабылданады. Байқау туралы ақпарат 380 мың мұғалім пайдаланатын kundelik.kz жүйесінде жарияланады,
делінген министрлік таратқан хабарламада.
Сондай-ақ, байқау тарихында алғаш рет барлық кезең, яғни қатысуға өтінімдерді қабылдау, тіркеу, конкурс құжаттарын тапсыру, бағалау Teachercontest.iac.kz порталында жүзеге асырылады.
Жүлде қорын ұлғайттық және бұл мықты мамандардың мамандыққа келуіне түрткі болып, осы кәсіпте ондаған жыл бойы еңбек етіп келе жатқан мамандарға көрсетілген құрмет болады деп сенеміз. «Үздік педагог» атағына білім беру ұйымдарында жұмыс істейтін және құжаттарды тапсыру кезінде кемінде 5 жыл үздіксіз педагогикалық өтілі бар педагогтар үміткер бола алады. Бұл — балабақша, мектеп, колледж мұғалімдері,
Оқу-ағарту министрлігінің Орта білім беру комитеті төрағасы Гүлмира Кәрімова.
Байқау аясында мұғалімнің білім саласын дамытуға қосқан үлесі, ұстаз қызметінің тиімділігі мен оның кәсіби шеберлігі ескеріледі. Бір айта кетерлігі, жылдан жылға үміткерлер саны ғана емес, олардың дайындық деңгейі де артып келеді.
Биыл байқауға қатысатын әрбір педагог сауалнаманы толтырғаннан кейін конкурстың одан арғы динамикасын бақылай алады, мысалы, қатысушылар қай кезеңде тұр, оларға сарапшылар қандай ұпай қойды,
деді Гүлмира Кәрімова.
Байқау үш кезеңнен тұрады:
I кезең – аудандық, қалалық деңгей;
II кезең – облыстық деңгей;
III кезең – республикалық деңгей.
Екі байқаудың қорытындысы бойынша ең жоғары балл жинаған мұғалімдер республикалық деңгейге өтеді.
Айта кетейік, республикалық «Үздік педагог» байқауы 2012 жылдан бері өткізіліп келеді. Осы уақыт аралығында байқау аясында мектепке дейінгі және орта, техникалық және кәсіптік білім беру ұйымдарының 600-ге жуық үздік педагогы анықталды.
«Үздік педагог» атағының иегерлеріне 3 млн теңге көлеміндегі ақшалай сыйақы және төсбелгі беріледі.
