Еңбек және халықты әлеуметтік қорғау министрі Тамара Дүйсенова Қазақстанда қанша Ресей азаматы жұмыс істейтінін айтты. Бұл туралы Informburo.kz хабарлады.

Тамара Дүйсенова Ресей азаматтары жұмысқа орналасу үшін келетінін, бірақ министрлік есеп жүргізгенде азаматтың 10 проценттік шегерімі бар-жоғына қарайтынын айтты.

Ол (10 проценттік шегерім — ред.) болса, онда нақты жұмыс орындары бар деген сөз. Бүгінде Қазақстан аумағында Ресей Федерациясының 22,5 мың азаматы жұмыс істеп, зейнетақы жарналарын аударып жатыр. Оның ішінде 2022 жылдың басынан бері 8 мың адам жұмысқа орналасқан,

деді Тамара Дүйсенова..

Министр жұмысқа тұрғысы келетіндер арасында ең танымал жұмыс қызмет көрсету саласы екенін айтты.

Олар негізінен қызмет көрсету саласына келеді, бұл — 72%. Өнеркәсіп — 16%, шамамен 9% — құрылыс, 2% — ауыл шаруашылығы. Кәсіптердің ішінде бухгалтер, клиенттермен жұмыс жөніндегі менеджерлер, сатушылар, тасымалдаумен айналысатын адамдар, жүргізушілер бар. Бұл — шамамен топ-5 мамандық»,

деді министр.

Былтыр елімізде Ресейдің 82 мың азаматы жұмыс істеген.