Үкімет отырысында Қазақстандағы бензин мен дизель отыны жайы туралы хабарланды.
22 тамыздағы жағдай бойынша, мұнай базаларындағы және жолдағы АИ-92 маркалы бензинінің жалпы қоры — 180 мың тонна. Бұл 14 күнге жетеді. Дизель отыны қоры — 220,8 мың тонна, бұл 13 күнге жетеді. Бұл туралы Энергетика министрі Болат Ақшолақов мәлімдеді.
Мұнай өңдеу зауыттарындағы қорлар: АИ-92 — 71 мың тонна; дизель отыны — 53,4 мың тонна. АИ-92 бензиніне қатысты жағдай тұрақты, жанар-жағармай құю станциясы желілерінде шектеу жоқ,
деді министр.
Ал дизель отынына шектеулер енгізілді. Дизельді талон мен карталар арқылы жеткізу, лимит қою басталды. Зауыттар жанар-жағармайды жеткілікті көлемде өндіреді. Зауыттағы қор 50 мың тонна екеніне қарамастан, зауыттан мұнай өнімдері тұрақсыз жеткізіліп жатыр. Бос вагон-цистерналар жеткілікті мөлшерде келмейді, вагондарды жеткізу мерзімі ұзарған.
Осыған орай, Премьер-министр Әлихан Смайылов бағаны бақылау және жанармай тапшылығын болдырмау жөніндегі комиссия құруды тапсырды. Ол премьер-министрдің орынбасары Роман Склярға бағаны бақылау және жанар-жағармай тапшылығын болдырмау жөніндегі тұрақты комисся құрып, оған өзі жетекші болуды таспырды.
Ұлттық экономика министрлігі Бәсекелестікті қорғау агенттігі және әкімдіктермен бірлесіп бағаны негізсіз көтерген жағдайда тиісті шара қабылдауды қамтамасыз етсін,
деді Әлихан Смайылов.
Премьер-министр Индустрия министрлігі, «ҚазМұнайГаз» және ҚТЖ-ға мұнай өңдеу зауыттарынан мұнай өнімдерін уақтылы жөнелту бойынша шаралар қабылдауды тапсырды.
