Мемлекет басшысы Қасым-Жомарт Тоқаев Астана ТЖД Өрт сөндіру және авариялық-құтқару жұмыстары жедел кезекшісінің көмекшісі Асқар Забикулиннің туыстары мен жақындарына көңіл айту жеделхатын жолдады. Ол қызметтік борышын өтеу кезінде ауыр жарақат алып, ауруханаға түскен еді. Бүгін, 20 қараша күні Асқар Забикулин ауруханада көз жұмды, деп хабарлайды Ақорданың баспасөз қызметі.

Асқар Серікұлы төтенше жағдайларға қарсы күрес саласындағы еңбегімен елімізге адал қызмет етудің үлгісін көрсетті. Астанадағы көпқабатты үйдегі өрт кезінде ол оқиға орнына жедел келіп, бірнеше адамның өмірін сақтап қалды. Ол өзінің іс-әрекетімен Отан алдындағы азаматтық борышына адалдығын және теңдесі жоқ батылдығын көрсетті. Оның есімі мен жарқын бейнесі біздің жүрегімізде мәңгі қалады,

делінген жеделхатта.

Мемлекет басшысының тапсырмасы бойынша ержүрек өрт сөндірушінің есімін мәңгі есте сақтау мақсатында Астана қаласындағы көшелердің біріне Асқар Забикулиннің есімі беріліп, бюсті орнатылады.

Естеріңізге сала кетейік, 20 қараша, жексенбі күні денесінің 80% күйік шалған өрт сөндіруші Асқар Забикулин ауруханада көз жұмды. Дәрігерлер оны аман алып қалу үшін бірнеше күн күресті.