Денсаулық сақтау министрлігінің бұрынғы басшысы Елжан Біртанов пен оның орынбасары Олжас Әбішевтің ісіне қытысты сот тергеуі аяқталды.
Аталған процесс «Zoom» платформасында онлайн режимде өтті. Онда алғаш болып сөз алған экс-денсаулық сақтау вице-министрі Олжас Әбішев өзіне тағылған айыптардың дәйексіз екенін алға тартып, толық ақтауды сұрады.
Құрметті сот және аталған процеске қатысушылар! Мен бұрын айтқанымдай, өзімді кінәлімін деп есептемеймін. Мені ата-анам әрқашан заңға бағынуға үйретті. Бұл менің отабысымның негізгі тәрбие өзегі болды.
Тергеу барысында барлық сұрақтарға нақты әрі анық жауап бере білдім. Маған тағылған айыптар ойдан шығарылған, дәлелсіз және олар Қаржылық мониторинг агенттігінің қиялынан туған. Біздің прокурорлар да шындыққа келгенде соқыр, саңырау. Айыптаушы жақтың ІТ технологиялардан хабары жоқ. Прокуратура іс қозғалып отырған электронды платформаның қалай жұмыс істейтінін де білмейді.
Мен өзімнің кінәлі емес екенімді дәлелдеу үшін соңына дейін барамын және мені толық ақтауды сұраймын,
деді Олжас Әбішев.
Келесі болып қорытынды сөз сөйлеген Денсаулық сақтау министрлігінің экс-басшысы Елжан Біртанов бұған дейінгі сот отырыстарында өзінің кінәсіздігін айғақтайтын нақты дәлелдер ұсынғанын атап өтті.
Біздің жалғыз қылмысымыз – жақсы мемлекеттік қызметкер болуға талпынған ниетіміз деп білемін.
Электронды платформаның бар екені, ақшаның қайда жұмсалғаны анық. Жағдайдың қалай өрбігені де баршаға айқын. Санитарлық авиация бойынша да солай. Мен ойымша, жеткілікті дәлелдер келтірдім және бұл істе мен ешқандай жеке бастың пайдасын көздемедім.
Құрметті сот, кеңесу бөлмесінде сіз біздің тарап ұсынған барлық дәлелдерді саралап, мемлекеттік айыптаушы тарап таққан заңсыз дәйектерді объективті түрде бағалап, мені және Олжас Әбішевті кінәсіз деп танисыз деп үміттенемін. Біз қылмыскер емеспіз, заңды бұзған жоқпыз,
деп түйіндеді Елжан Біртанов.
Судьяның айтуынша, сот үкімі шығатын уақыт алдын ала белгіленіп, оған айыпталушылар мен айыптаушы орган тарапынан 8 адам шықырылады. Ол процесс офлайн режимде өтетін болады.
Еске сала кетейік, экс-министр Елжан Біртановқа ведомство басшысы болған кезде орынбасары Олжас Әбішевпен бірге жалған ақпараттандыру платформасын іске қосу арқылы қызмет бабын асыра пайдаланды деген айып тағылды.
Осылайша, айыптаушы тарап экс-шенеуніктердің мемлекетке 1,5 млрд теңге көлемінде шығын келтіргенін мәлімдеген болатын.
