Оқу-ағарту министрлігі аппарат кеңесінде жаңа оқу жылында 1-класс оқушылары енді 35 апта (бұрын 33 апта еді), қалған 2-11-класс оқушылары 36 апта (бұрын 34 апта еді) оқитыны хабарланды. Бұл туралы Informburo.kz сайты жазды.
Оқу жылындағы демалыс күндері мынадай болады:
- күзгі демалыстар — 7 күн (2022 жылғы 31 қазаннан 6 қарашаға дейін (қоса алғанда));
- қысқы демалыстар — 9 күн (2022 жылғы 31 желтоқсаннан 8 қаңтарға дейін (қоса алғанда));
- көктемгі демалыстар — 9 күн (2023 жылғы 18-26 наурыз арасы).
Бұған дейін оқу жылындағы демалыс уақыты 30 күннен кем емес еді, енді 25 күн болады.
Бірінші кластарға қосымша демалыс күндері беріледі — 7 күн (2023 жылғы 6 ақпаннан 12 ақпанға дейін (қоса алғанда)). Оқу жылы 31 мамырда бітеді (бұрын 25 мамыр еді). Жазғы демалыс 1 маусымнан 1 қыркүйекке дейін созылады.
Министрдің бұл бұйрығы Әділет министрлігінде тіркеу сатысында тұр. Оқу жылы мен каникул ұзақтығына қойылатын бұрынғы талаптарды көздейтін мемлекеттік стандарт күшін жоғалтты.
Шілде-тамыз айларында министрдің бұйрығы жобасы «Ашық НҚА» порталында талқылау үшін жарияланды. Құжат қоғамда үлкен резонанс тудырды, пікір жазған ата-ананың көпшілігі оқу жылының ұзартылуына қарсы болды.
Оқу-ағарту министрлігі оқу жылының ұзақтығын ұлғайту күнделікті сабақ санын қысқартуға, күрделі тақырыптарды оқуға көбірек уақыт бөлуге, дамыта оқыту қағидаттары бойынша оқу процесін ұйымдастыруға мүмкіндік беретінін хабарлады. Жаңа оқу жылынан бастап мектептерде апталық оқу жүктемесін азайту жоспарланып отыр.
