Қазақстандық сауда сайттының бірінде Ақтаудағы жағажайдың бір бөлігі сатылатыны туралы ақпарат жарияланды. Алайда бұл мәлімдеме жалған болып шықты, деп хабарлайды Tengrinews.kz.
Азамат Сәрсенбаев есімді Instagram желісі қолданушысы парақшасында Ақтаудағы Каспий теңізі жағалауындағы жер учаскесін сату туралы хабарландырудың скриншотын бөлісті.
Сатылады. Саудаласамыз. Вилла, бизнес орталық, жоғары санатты қонақ үй кешенін салғыңыз келе ме? Бізде теңіз жағасында орналасқан тамаша жер телімі бар. Кіруге, шығуға ынғайлы, барлық құжаттары бар. Кез келген уақытта қоңырау шалыңыз, көрсетуге дайынмын,
делінген сайтта жарияланған хабарландыруда.
Ақтау әкімдігі бұл жер учаскесі жеке меншік екенін, бірақ сайтта жарияланған ақпарат шындыққа жанаспайтынын айтты.
4А шағынауданында (Карвон мейрамханасының жанында) орналасқан жер учаскесі 2007 жылы жеке тұлғаның атына ресімделген. 2020 жыл 5 шілдедегі сатып алу-сату шартына сәйкес жеке меншік құқығында. Ақтаудың бас жоспарына сәйкес аталған жер учаскесі спорт мекемесінің аумағы ретінде қарастырылған. Бұл аумаққа спорттық-сауықтыру орталығын салу көзделген. Осыған байланысты нысаналы мақсатты өзгерту мүмкін емес,
деп хабарлады әкімдік өкілі.
