Ішкі істер министрлігі азаматтарға алаяқтықтан зардап шегудің алдын алу және ескерту сипатындағы SMS жібере бастады, деп хабарлайды Polisia.kz.
4 тамызда Ішкі істер министрінің Цифрлық даму министрлігі өкілдерімен және байланыс операторларымен кездесуінде SMS арқылы алаяқтық туралы халықты бірыңғай хабардар ету туралы айтылған еді.
Қазақстанның әр тұрғыны тұрғылықты және орналасқан жеріне қарамастан, мобильді байланыс жасай алады. SMS арқылы алаяқтық фактілері туралы ақпарат беру азаматтарды жедел хабардар етуге мүмкіндік береді.
ІІМ мынадай сақтық шараларын еске салды:
– өзін банк немесе құқық қорғау органы қызметкері ретінде таныстырып, ақшаны қауіпсіз шоттарға аудару, несие рәсімдеу үшін телефон арқылы нұсқау айтатын адамдарға ермеу. Құқық қорғау органдары арнайы операцияларды телефон арқылы жүргізбейді;
– өзін банк, полиция қызметкері ретінде таныстырған адамға жеке деректерді, пластикалық карталар деректемесін, аударымдар туралы түбіртекті, әсіресе кодтар мен құпия сөздерді хабарламаңыз;
– белгісіз және тексерілмеген сайттарға және басқа дереккөздерге жеке дерегіңізді бермеңіз. Тексермей, алдын ала төлем жасамаңыз. Төлемді тауарды алғаннан кейін жасауға келісуге тырысыңыз;
– күмәнді шарттар бойынша аударымдар жасамаңыз;
– қосымшаларды орнату үшін тек ресми App Store мен Play Market-ті пайдаланыңыз;
– белгісіз адамдардан келген сілтемеге кірмеңіз. Көбінесе алаяқтар төлем жасау үшін фишингтік сілтемені басуды ұсынады;
– банкинг қызметіне кіретін құпия сөздерін жиі өзгертіп отырыңыз. 3D арқылы қорғауды және банктер ұсынатын басқа қауіпсіздік шараларын қолданыңыз;
– өз шоттыңыздағы ақша айналымын жиі тексеру қажет.
