Frontiers in Psychiatry жариялаған жаңа зерттеу ұйқының адамның физиологиялық денсаулығына айтарлықтай әсер етуі мүмкін екенін анықтады. Алайда, ғалымдардың ескертуінше, шектен шығудың қажеті жоқ. Бұл өте қауіпті болуы мүмкін.

Екі мыңға жуық еріктілерді бақылау Норвегияда жүргізілді. Ғалымдар олардың тәулігіне қанша уақыт ұйықтайтынына, «қарақұйрық» немесе «үкі» болғанына қызығушылық танытты. Үш ай ішінде қатысушылардың ұйқы сапасы бағаланды, егер әртүрлі инфекцияларға шалдығатын болса хабарлауы сұралды.

48,3% респонденттердің жауаптары ұйқының созылмалы бұзылуының критерийлеріне сәйкес келді, ал тағы 46,9%-ы ұйқының бұзылуы туралы айтты. Ал еріктілердің 16%-ы үш айдың ішінде ауырып қалды.

Ұйқы мен аурудың байланысы бар, бірақ бұл нақты емес

Асқазан-ішек жолдарының инфекциясы мен зәр шығару жолдарының инфекциясы дұрыс ұйықтамаған науқастарда жиі кездесті. Алты сағаттан аз ұйықтаған науқастарда ауру жұқтыру қаупі 27%-ға жоғары болды. Бірақ сонымен бірге тоғыз сағаттан артық ұйықтаған науқастарда инфекцияның даму қаупі 44%-ға жоғары болды. Егер пациенттер созылмалы ұйқысыздықтан зардап шегетін болса, онда ауру қаупі да артады.

Зерттеуде «ұйқысыздық жоғарғы тыныс жолдарының инфекциясы мен ауруханаға жату қаупін арттырады» делінген. Нашар ұйқы иммундық параметрлерге әсер етуі және жалпы дененің инфекциямен күресу қабілетін төмендетуі мүмкін.

Алайда ұйқының ұзаққа созылуы жүрек-қан тамырлары аурулары, қант диабеті және семіздікпен ауыратын науқастарға тән болды. Бұл сондай-ақ депрессия, шылым шегу және алкогольді тұтынумен байланысты.

Дегенмен, ұзақ ұйықтау денсаулыққа қатысты проблемалардың себебі ме, әлде денсаулыққа қатысты проблемаларды тудыруы мүмкін өмір салтының белгісі ме?! Зерттеушілер мұның қазіргі таңда нақты белгісіз екенін айтып отыр. Жеткілікті ұйқының болмауына келетін болсақ, мұнда бәрі анық – жақсы денсаулық пен иммунитетті сақтау үшін ұйықтау қажет.