Атышулы әнші Жан Ахмадиев өз мәнерінен таймай, тағы бір шулы мәлімдеме жасады. Stan.kz порталына берген сұхбатында ол балаларына қамқор әке, алайда жарына өте қатал екенін айтқан. Әйелін анда-санда ұрып тұратынын жасырмады.
«Әйелді аптасына бір рет қамшымен сабап тұру керек» деген қазақта сөз бар. Қазір әйелінің айтқанынан шықпайтын еркектер қаптап кеткен. Ол неге? Өйткені әйелінің аузын қаға алмайды. Әйелінің аузын қағу деген сөзін бөлу емес. Әйелді сөзбен жеңу ешқашан мүмкін емес. Бірақ бір шапалақпен жеңуге болады,
дейді Жан Ахмадиев.
Осылайша ол әйелін орнынан жығып отыратын көрінеді. Ол әйелге аптасына бір рет шайтан кіріп кететініне сенетінін айтты. Сол шайтанды шығару үшін шапалақ қажет. Әйелді қатты еркелетуге болмайды, дейді ол.
Сұхбаттасушының “Әйелді аптасына бір рет ұру керек” деген қазақ даналығы туралы естімегенін, қызыңызды да болашақта солай ұрғанын қалайсыз ба деген сұрағына Жан Ахмадиев мақұлдап жауап берді.
Егер де қателік болса, аузына ие болмаса, күйеуінің көңілінен шықпаса, ұрсын. Мен қарсы емеспін. Қатты ұруға болмайды. Шапалақ пен тепкілеу екі бөлек. Әйелінің көзін көгерту, денесінде көгерту ол енді еркектікке жатпайды,
дейді Жан Ахмадиев.
Дегенмен, әншінің айтуынша, тек әйел көңілінен шықпаса, әйелің бағынбаса, әйелің шектен асып кетсе ғана ұру керек. Ал егер әйелің тәрбиелі болып, ойыңнан шығып, айтқаныңның бәрін істеп тұрса онда қол көтерудің де маңызы шамалы. Алайда, оның пікірінше, ондайлар аз.
Бірақ та сөз түсінбейтін қатындар көп. Оны мойындау керек. Сондықтан аздап кетіп қалады. Мен өзім туралы айтып отырмын. Бірақ та әйелдеріңді ұрып тепкілеңдер деген ешкімге кеңес бермеймін,
деп ақталды Ахмадиев.
Сондай-ақ, Жан Ахмадиев сұхбат барысында эстрада әншілері туралы да батыл мәлімдемелер жасады. Айтуынша, өнер адамдары топастау болып келеді. Сонымен қатар олардың контент жасауға басы жетпейді.
Қазіргі таңда әнші, өнер адамдарына деген қызығушылық төмендеп кетті. Мұны да мойындау керек. Білесіздер, оларды шегірткелер деп атады. Содан кейін короновирус келгеннен кейін бүкіл өнер адамдарын аяғынан тартып, жерге бірақ түсірді ғой. Халық пайдасы жоқ әншілерсіз той жасауға болатынын түсінді. Содан кейін олардың қазір таңда ақшасы көп деп те айта алмаймын. Басты проблема, контент жасауға ақылдары жетпейді, жалқаулықтары жібермейді,
дейді Жан Ахмадиев.
