19 қаңтар түнгі үште журналист Вадим Борейкоға шабуыл жасалды. Бұл туралы ол өзінің Телеграм арнасында хабарлады.
Борейконың айтуынша, белгісіз біреулер оның пәтерінің есігіне құрылыс желімін жағып кеткен. Үш күдіктінің бұл әрекетін көршілері байқап қойған. Алайда олар қашып үлгерген.
Журналист дереу полицияға жүгініп, арыз жазған. Оның сөзінше, оған қызметіне байланысты қасақана қастандық жасалған болуы мүмкін.
Құрылыс желімінен жанғыш заттың иісі шығады. Меніңше, олар есігімді бұғаттап, кейін өрт қоймақ болған,
деп жазды ол өзінің арнасында.
Полиция шақырған соң Борейко заң бұзушылардың үйінің подъезінің есігін де бүлдіргенін көрген.
Есікке телеграм арнамның атауын жазып кеткен,
дейді журналист.
Ал бұған дейін бір күн бұрын Борейко Телеграм арнасында Ulys Media сайтының бас редакторы Самал Ибраеваға кибершабуыл жасалғанын жазған болатын.
Ulys Media-ның бас редакторы Самал Ибраева тек маған ватсапқа: «Сайтымды бұзып, менің, балаларымның жеке деректерін, отбасымның суреттін жариялаған. Қазір сайт жұмыс істемейді» деп жазды,
деді Борейко.
Кейінгі кездері журналистерге шабуыл жасаушылар көбейген. Мысалы, осы күнге дейін «El Media» редакциясының ғимаратына бірнеше рет шабуыл жасалған. Сонымен қатар 14 қаңтарда Алматыда белгісіз біреулер журналист Динара Егеубаеваның көлігінің терезесін шағып, от қойып кеткен.
Біреулер Динара Егеубаеваға «Қаңтар оқиғасы туралы жазған материалдары үшін қастандық жасалды» деп топшыласа, енді біреулер «парламенттік сайлау алдындағы қорқыту және үркіту амалдары» екенін айтады.
Қалай десек те, журналиске кәсіби қызметі үшін қастандық жасау дұрыс емес! Журналистің міндеті ақпарат тарату, беру, жеткізу,
деп жазды журналист Гүлмира Әбіқай.
15 қаңтарда Динара Егеубаеваның көлігін өртеді және «El Media» редакциясына шабуыл жасады деген күдікпен бес адам ұсталды. Олар 2005, 2006 және 2007 жылғы кәмелетке толмаған азаматтар болып шықты.
Күдіктілердің сөзіне сәйкес, олар екі тапсырысты да белгісіз адамнан интернет арқылы алған. Тапсырыс беруші келіскен ақшаны онлайн төлеген.
Ал журналист Вадим Борейко өзіне, Динара Егеубаева, Самал Ибраева, Гүлжан Ерғалиева, Гүлнр Бажкеноваға жасалған қастандықты бір адам не ұйым ұйымдастыруы мүмкін екенін алға тартып отыр.
Ащы шындықты ашық жазатын журналистерге кім шабуыл жасап жүр?
