Әнші Серікбол Сайлаубек неге үнемі көзілдірік тағып жүретінін түсіндірді. Бұл туралы ол «Уақыт көрсетеді» YouTube-арнасында айтты, — деп хабарлайды Massaget.kz. 

Оның сөзінше, әлеуметтік желілерде өзі отырмайды.

«Мен Instagram-ға көп араласпаймын. Інім отырады. Өздері салады. Маған «жазбайсыз» дейсіз ғой. Көз дұрыс көрмейді. Не жазамын?», — деді ол.

Бағдарлама барысында әнші көзілдірігін шешіп көрсетті.

«Сол көзіңіз бе? Бұл көзге не болған? Бала кезден осылай ма» — деп сұрады журналист.

Әнші көзіне не болғанын айтып берген.

Бұл туғаннан осылай. Біраз сұхбатта айттым. Анам өмірге 4 қыз алып келген. Әкеге ұл керек қой. Әкем дастарқан басында отырып, Алладан «бір көзі соқыр болса да, ұл берші» деп сұраған екен. Сондықтан дұрыс сөйлеу керек деп отырмын. Әр сөзің қабыл болады. Бір-бірімізді барынша көтерейік, жақсы сөздер көп айтайық. Осылай, әкем тіледі, дүниеге бір көзбен келдім,

деді Серікбол Сайлаубек.

Серікбол Сайлаубек деген кім?

Қазақстанның «Лепсі» атанған Серікбол Сайлаубек Сарқанд қаласында (Алматы облысы) дүниеге келген. Бұл аймақтың тұрғындарының көбі ауыл шаруашылығымен айналысатындықтан, бала әнші болуды ойламайды. Алайда бір күні қалаға концертпен музыканттар келетіні белгілі болады. Бала Серікбол әншілерді қатты күтеді, алайда концертке баруға ақшасы болмайды. Сөйтіп, ол есейгенде әртіс болуды мақсат қойып, тегін концерт беруді армандайды.

Есейгенде Серікбол Сайлаубек өз арманын орындады. Танымал болған соң ол Қазақстан қалаларында 12 тегін концерт өткізді.

Сайлаубек бейіндік білім алған музыканттар қатарынан. Жүсіпбек Елебеков атындағы эстрада-цирк колледжінің студенті. Ол Қайрат Нұртаспен бірге оқыған, оқу жылдарында екеуі жақсы араласқан.

Халық арасында Серікбол Сайлаубектің «Ой, жеңгей», «Достарым», «Бота-бота» хит әндері танымал. Үйленген, 4 баланың әкесі.