Ұлттық банк енді номиналы 200 теңге болатын қағаз ақшаны шығармайды. Бірақ бұл банкнот заңды түрде төлем құралы ретінде қабылдануы тиіс деп хабарлайды Тime.kz.
Дерекке сүйенсек, аталмыш қағаз ақша әлі де заңды төлем құралы. Оны сауда орындарында қабылдау міндетті. Я болмаса банкте алмастыруға болады.
2020 жылғы 28 қаңтардан бастап қолма-қол ақша айналымында номиналы 200 теңгелік банкноттармен қатар ұқсас номиналдағы монеталар да бар. Айналымдағы номиналы 200 теңгелік қағаз ақша қалады және табиғи тозығы жеткенде ғана айналымнан шығарылады. Банкнотаны монеталармен қатар айналыста және төлемдердің, банк операцияларының және аударымдардың барлық түрлері бойынша қабылдау міндетті,
делінген ақпаратта.
Сондай-ақ, қаржы институты қағаз ақшаларды қайда алмастыруға болатынын да түсіндірген.
Бұл банкноттарды банктер мен «Қазпошта» АҚ-ның барлық бөлімшесінде, сондай-ақ ҚҰБ филиалдарында ұсақтауға және айырбастауға болады. Ал бүтін ақшаны қабылдамағаны үшін Әкімшілік құқық бұзушылық туралы кодекстің 206-бабы бойынша жауапкершілік қарастырылған,
деп түсіндірген.
Сондай-ақ сайт тілшілері қағаз ақша мен монетаны шығару кезінде қайсысы арзанға түсетінін және шыдамдылығы бойынша қайсысы көпке жарайтынын сұраған. Ұлттық банк жауабы мынадай:
Орташа есеппен айтсақ, банкноттар айналымда бес жылға дейін жүре алады. Монеталардың орташа қызмет ету мерзімі шамамен 10-15 жылды құрайды. Ал номиналы 200 теңге болатын банкноттардың орташа қызмет ету мерзімі бір жылдан аспайды. Жалпы банкноттар мен монеталар өндірісі Қазақстан Ұлттық Банкі мен қарсы әріптестер арасындағы шарттық қатынастармен байланысты. Жасалған шарттар бойынша қарсы серіктестердің келісімінсіз коммерциялық шарттарды жария ету азаматтық-құқықтық жауапкершілікке әкеп соғады,
делінген Ұлттық банк жауабында.
