Қонаев әкімінің айтуынша, қаладағы ойынхана ешкімге кедергі келтірмейді, керісінше тек пайда алып келеді.
Қала басшысы мойындағандай, ойынхананы жабу туралы мәселені сөз етуге тұрмайды. Оның айтуынша, аталмыш ойын ошақтары 7,5 мыңнан астам адамды жұмыспен қамтып отыр, сол себепті ойын орындарының жергілікті халыққа пайдасы зор.
Казино аймақ экономикасына мультипликативтік әсер береді. Онда біздің тұрғындар жұмыс істейді, сонымен қатар жергілікті кәсіпорындар ойын алаңдарына қызмет көрсетеді. Осының барлығы, сайып келгенде, қала тұрғындарының тұрақты жұмыс орнының болуына мүмкіндік береді. Оларды жабу туралы сөз қозғалмады,
деді Нұрлан Қуматаев.
Айта кетейік, Қазақстанда казино ашуға рұқсаты бар екі қала бар, оның бірі — Бурабай, екіншісі бұрынғы Қапшағай қаласы еді. Енді Қапшағай Қонаев деп аталып, ол Алматы облысының орталығына айналды. Бүгінгі күні Қонаев аумағында (Алматы-Талдықорған тас жолының бойында) бес ойынхана, төрт ойын клубы және алты букмекерлік кеңсе жұмыс істейді.
