Қызыл жалау соңғы рет екі жыл бұрын көтерілген.
Иран Джамкаран мешітінің төбесіне қызыл ту көтерді. Болжам бойынша, бұл тудың көтерілуі соғыс жарияланды деген ұстанымды білдіреді.
Иран алдағы 48 сағат ішінде Сауд Арабиясына және Күрдістанға шабуыл жасауы мүмкін, деп жазады Aquila Telegram арнасы Сауд Арабиясының барлау қызметіне сілтеме жасап.
Сауд Арабиясының мәліметінше, Иран үкіметке қарсы наразылықтарды доғару үшін осындай қадамға барғалы отыр. Белгілі болғандай Сауд Арабиясы, АҚШ және басқа да мемлекеттер барлау күштерінің ақпаратына сілтеме жасай отырып, Иранның шабуыл жасауы туралы ескерту алған. Жауға қарсы әскерлерін дайындап отыр.
Кек алу деген мағынаны білдіретін қызыл жалау соңғы рет екі жыл бұрын Касем Сүлеймани өлтірілгеннен кейін көтерілген болатын. Артынша Иран АҚШ-тың Ирактағы базаларына соққы жасады.
Айта кетсек, бұған дейін Тегеран АҚШ, Ұлыбритания, Израиль және Сауд Арабиясын елде шерулер ұйымдастырды деп айыптаған болатын.
Еске салайық, Ирандағы жаппай тәртіпсіздіктер Махсу Амини өлімінен кейін басталды. 17 қыркүйек күні жас қызды дұрыс киілмеген хиджаб үшін тәртіп сақшылары аяусыз соққыға жыққан. Ауруханаға түскен қыз бірнеше күннен соң есін жимай қайтыс болды.
