КСРО-ның бірінші президенті Михаил Горбачев 92 жасында қайтыс болды. Бұл туралы Риа Новости хабарлады.

Михаил Горбачев 92 жасында Орталық клиникалық ауруханада көз жұмды.

Ол 1931 жылғы 2 наурызда Ставропольск облысы, Привольное ауылында туған. 1955 жылы М.В. Ломоносов атындағы Мәскеу мемлекеттік университетінің заң факультетін бітірген. 1967 жылы Ставропольск ауылшаруашылығы институтының сырттай оқу бөлімін бітірді. Университетті аяқтаған соң ол Ставрополь облыстық прокуратурасына бөлу арқылы жіберілді. Содан кейін партиялық жұмыстармен айналысты.

1985 жылы КОКП Орталық Комитетінің кезектен тыс пленумында Михаил Горбачев Бас хатшы болып сайланды. 1988 жылғы 1 қазаннан бастап ол КСРО Жоғарғы Кеңесі Президиумының төрағасы қызметін де атқарды.

1990 жылы КСРО халық депутаттарының кезектен тыс үшінші съезінде ол Кеңес Одағының бірінші және соңғы президенті болып сайланды. Ал 1991 жылғы 25 желтоқсанда КСРО-ны тарату туралы Беловеж келісіміне қол қойылғаннан кейін Михаил Горбачев президент ретіндегі қызметін тоқтататынын мәлімдеді.

Горбачевтің сыртқы саясаттағы басты еңбегінің бірі ядролық қарусызданудың басталуы және оның бастамасымен Кеңес әскерлерінің Ауғанстаннан шығарылуы болды.

Зейнетке шыққаннан кейін ол лекциялар оқыды, сұқбат берді, Әлеуметтік-экономикалық және саясаттану зерттеулерінің халықаралық қорын құрды.