Өнеркәсіп және құрылыс министрлігі мен ArcelorMittal Temirtau бірлескен мәлімдеме жасады.
Мәлімдемеде биыл 28 қазанда Костенко көмір шахтасында апат болып, 46 кенші қаза тапқаны айтылған. Қаза тапқан кеншілердің отбасыларын қолдау үшін барлық күш-жігер жұмсалып, оқиғаның себептері бойынша тергеу жүргізіліп жатыр.
Бұдан басқа, ведомство мен компаниядағылар Қазақстан үкіметі мен ArcelorMittal компаниясының ArcelorMittal Temirtau меншігін Қазақстан үкіметіне беру туралы мәмілені хабарлады.
Бұл келіссөздер бірнеше ай бойы жүргізілді және жақында Қазақстан Республикасының үкіметі мен АМТ-ның, сондай-ақ оның еншілес кәсіпорындарының болат және тау-кен операциялары қызметінің болашақ бағытына қатысты алдын ала келісімге келді. ArcelorMittal Temirtau — ішкі және өңірлік нарықтардағы ең маңызды болат материалдарын жеткізушілердің бірі. Осы жылдар ішінде компания өзін барлық таңдалған нарықта болат тұтынушыларына стратегиялық серіктес ретінде көрсетті. Сондықтан АМТ қызметін тиімді жоспарлаумен ұйымдастыру және оның мүдделі тараптары үшін кез келген қолайсыздықты болдырмау үшін барлық күш-жігер жұмсалады,
делінген мәлімдемеде.
Сондай-ақ мәлімдемеде АМТ-ның барлық мүдделі тарабына, әсіресе оның клиенттеріне, мердігерлері мен жеткізушілеріне үндеу жасалған:
ArcelorMittal Temirtau-мен (Теміртаудағы болат зауытын, көмір бөлімшесін, Ақтаудағы құбыр зауытын және ТМД елдеріндегі өкілдіктерді, еншілес кәсіпорындарды қоса алғанда) байланысты барлық құқығы мен міндеттемесі сақталады. Қазақстан Республикасының үкіметі мен АМТ-ның барлық құқығы мен міндеттемесін, соның ішінде клиенттермен жеткізу келісімдерін, жеткізушілерден мердігерлердің қызметтерін қоса алғанда, тауарлар мен қызметтерді қабылдауды, қызметкерлер алдындағы міндеттемелерді және тағы басқасын сақтауға қатысты бизнесті толық жалғастыруды қамтамасыз етеді,
дейді үкімет пен компания өкілдері.
Сондай-ақ тапсырыстарды брондау, келісімшарттар жасасу, жөнелту, есеп айырысу және жеткізушілермен келісімшарттар жасасуды қоса алғанда, АМТ бизнес-процестері әдеттегідей жұмыс істейтіні айтылған.
«AMT өз клиенттері үшін сенімді серіктес мәртебесін сақтауды жалғастырады және болашақта да солай етуге тырысады. Қолдауыңыз үшін рақмет», — делінген бірлескен мәлімдемеде.
