Қазақстан бойынша өміріне ең риза адамдар Шымкентте тұрады.. Бұл туралы экономикалық зерттеулер институтында Азия даму банкімен бірлесе орындалған өңірлік теңсіздікті зерттеу нәтижелері бойынша өткен семинарда айтылды.

2022 жылдың тамыз-қараша айларында Қазақстан Үкіметі мен АДБ арасында білім және тәжірибе алмасудың бірлескен бағдарламасы шеңберінде өңірлердегі халықтың өз әл-ауқатын бағалау бойынша жалпыұлттық зерттеу жүргізілді. Зерттеуді Лондон экономика және саясаттану мектебінің (LSE) және экономикалық зерттеулер институтының (ERI) сарапшылары бірлесе жүргізді.

Зерттеу жұмыстарына 140 қала мен ауылдан 4 мыңнан астам тұрғын қатысты.

Кейбір нәтижелерді қарастыратын болсақ, субъективті әл-ауқаттың көрсеткіштері орташадан жоғары, 10 балдық шкала бойынша 7 балдан жоғары бағаланғанын атап өткен жөн. Қала тұрғындарының көрсеткіштері ауыл тұрғындарынан сәл жоғары.

Бүгінгі өміріне қанағаттану индексі бойынша Шымкент 7,91, Атырау 7,90, Ақтөбе 7,68 ұпай жинаған. Үздік бестікке сонымен бірге Маңғыстау облысы мен Алматы қаласы кірді.

Қазақстандағы өз өмірі өзіне ұнамайтындар шоғырланған басты мекен — Павлодар. Оның индексі — 6,58. Аутсайдерлер үштігіне Павлодармен қатар, Абай облысы (6,88) мен Астана қаласы (6,94) кірді.

Ел бойынша қаржылық жағдайға қанағаттану деңгейі 10-нан 5,85 ұпайды құрайды. Шымкент қаласы мен Атырау облысындағы қаржылық жағдайға қанағаттанудың жоғары деңгейі, Жамбыл, Қызылорда және Павлодар облыстарында ең төмені тіркелді.

Сондай-ақ, ел бойынша жұмысқа орналасу мүмкіндіктеріне қанағаттану деңгейі де зерттелді. Ең жоғарғы деңгей Астана қаласы мен Қарағанды облысында, ең төменгі деңгей Қызылорда және Жамбыл облыстарында тіркелді.