Парадокс. Бұл фильм прокатқа шықпай тұрып Qazaqstan телеарнасында үш рет көрсетілді – ерекше қызығушылық болмаған.
Тикетон сайты 12-15 қазан аралығында көрсетілген фильмдердің кассалық түсімі туралы деректі жариялады.
Бірінші орында «Міржақып: Оян, Қазақ» фильмі 107 млн теңге жинаған.
Ал өзге отандық фильмдер арасында «Сoco&Janbo» фильмінің кассасы 62 млн теңге, «Байдың қызын аламын» 24 млн теңге, «Белгісіз батырлар» 18 млн теңге.
Мәдениет және ақпарат министрі Аида Балаеваның айтуынша, «Міржақып. Оян, қазақ!» фильміне көрерменнің мұншалықты қызығушылық танытып, ажиотаж болатынын ешкім күтпеген.
Мұндай дүрбелең болады деп ойламадық. Көрермендер қызығушылық танытқаннан кейін біз оны тағы бір аптаға ұзарттық. Қазір прокат аяқталды. Бізде басқа да фильмдер бар, сондықтан мұнда ешқандай мәселе жоқ деп ойлаймын. Парадокс сол, бұл фильм Qazaqstan телеарнасында үш рет көрсетілді – ерекше қызығушылық болған жоқ. Қазір фильм көпшіліктің назарына, YouTube-қа салынды,
деді Аида Балаева бүгінгі брифиңде.
Фильм бастапқыда телесериал ретінде түсірілген. Барлық 6 бөлімді YouTube желісінен көре аласыз.
