Заманауи дәретхана жылыту жүйесімен, ыстық су және мүгедектерге арналған арнайы орынмен қамтамасыз етілуі керек болған.
Otyrar.kz мәліметінше, дендросаябақта құны 9 млн теңге тұратын бес дәретхана орнатылған. Оларды әлеуметтік-кәсіпкерлік корпорация сатып алыпты. Жұмсалған 45 миллион теңгені ұжымдық қордан алған. Алайда, құны бір бөлмелі пәтермен шамалас әжетханалардың жағдайы мәз емес. Қақпағы сынған, жылы су жоқ, қол кептіруге арналған құрал да істен шыққан және ең бастысы мүмкіндігі шектеулі жандарға арналған бөлмелердің есігі жабық. Тұрғындардың сөзінше, дәретханалар өз бағасына сай емес.
Қазір жылу жоқ, ыстық су да жоқ. Мүгедек адамдарға арналған кабинаның есіктері жабық. Ішіне қалай кіреді? Көптеген адамдар әлі де ескі дәретханаларды пайдаланып жүр. Ол жақта әлдеқайда таза. Бұл 9 миллион теңге тұрмайды
дейді Шымкент қаласының тұрғыны Гүлжан Мейірбекова.
Дәретхана салуға қажетті қаржы «Шымкент – қайырымды қала» қорынан бөлінген. Ал бұл қор 2020 жылы әлеуметтік-кәсіпкерлік корпорациясы жанынан құрылған. 2 жыл ішінде мұнда демеушілік көмек ретінде 1 млрд-қа жуық қаржы түскен. Ал оның 45 миллионы 5 дәретханаға жұмсалып отыр. Сыбайлас жемқорлыққа қарсы іс-қимыл агенттігі тарапынан 1 ай көлемінде сыртқы талдау жұмыстары жүргізілген.
Әрине, бұл бюджеттік қаржы емес, дегенмен бұл демеуші, меценаттардың қаржысы болғандықтан қаржыны мақсатты, тиімді жұмсау қажет
сыбайлас жемқорлыққа қарсы іс-қимыл агенттігі Шымкент қаласы бойынша депаратментінің бас маманы Жани Қамбар.
«Шымкент -қайырымды қала» қоры азаматтардың әлеуметтік осал топтарына көмек көрсету, бизнестік бастамаларды қолдау және бизнес-жобаларды қаржыландыру үшін құрылған. Ал тиісті бағадан 2 есе қымбатқа сатып алынған әжетхананың талапқа сай немесе сай еместігін алда тиісті уәкілетті орган тексереді.
