Павлодар облысының Башмачное және Железинки ауылдары әкімі ормандағы өртті ауыздықтамағаны үшін жазалануы мүмкін. Бұл туралы Pavlodarnews.kz жазды.
Ауыл әкімшіліктері далада шыққан өртті өшіру шараларын жүзеге асыруы керек еді.
Далада шыққан өрттің орманға өтіп кетуіне мүмкіндік берген әкімдіктерге шағым түсті. Бұл туралы облыстық орман шаруашылығы және жануарлар дүниесі аумақтық инспекциясының басшысы Руслан Төлепбаев мәлімдеді.
Оның айтуынша, орман қорғау мекемелері Железинка ауданындағы Башмачное және Железинка ауылдарының әкімдіктерінен 3 миллион теңге өндіру туралы сотқа шағым түсірген.
Орман қорының өртенуіне әкеп соқтырған өрт жауапкершілігі дала өрті болған шаруа қожалығына жүктеледі. Кінәлілерді анықтау мүмкін болмаса, дала өртін дер кезінде ауыздықтау шараларын қолданбағаны үшін әкімдіктердің үстінен сотқа арыз жолданады,
деді Руслан Төлепбаев.
Оның айтуынша, биылғы 116 орман өртінің 12-сіне далада шыққан өрттің мемлекеттік орман қоры аумағына өтіп кетуі себеп болған. Орманда өрт қауіпсіздігі ережелерін бұзған екі адам жазаланды. Оларға 53,6 мың теңге айыппұл салынды.
