3 маусымда ер адам 12 жасар ұлы мен 7 жасар қызының көзінше гантельмен жұбайының басынан ұрып, ванна бөлмесінде соққыға жыққан. Артынша іздерден арылу үшін үйді тазалап, гантельді сүртіп қойған. Әйелді жуындырып, киімін ауыстырып, залға апарған. Содан кейін оны балалармен тастап, үйден кетіп қалған.
Белгілі болғандай ол бұрын да әйеліне қол көтеріп келген. Полицияда есепте тұрған.
Барлығы қызғаныштан болған. Жазда жұбайын туысқанына қызғаныпты. Жәбірленушінің айтуынша, балаларын «қазір барлығымыз өлеміз» деп қорқытқан. Артынша әйелін ваннаға кіргізіп, алтындарын жұлып, аса қатігездікпен зорлаған.
Сол кезде ұлым есікті қағып, ана, бәрі дұрыс па деп сұрады. Барлығы жақсы балам, мен жуынып жатырмын, қазір шығамын дедім. Бұрынғы жолдасым қолына пышақ ала жүгірді. Мені тұншықтырып, өлтіре жаздады. Кейін пышағын гантельге алмастырып, басымнан бірнеше рет ұрды. Сол сәтте бас сүйегімнің жарылғанын естідім,
дейді зардап шеккен әйел.
Түні бойы әйел екі литр қан жоғалтып, өле жаздаған. Күйеуі балаларына туыстары мен полицияға хабарласуға және есікті ешкімге ашпаңдар деп тыйым салған.
Таңертен әйелдің туыстары үйге келіп, жедел жәрдем шақырған. Алайда дәрігерлер оның тірі қалатынына сенбепті. Ол сегіз күн бойы жан сақтау бөлімінде жатты. Екі баланың анасы қазір тірі, бірақ екінші топтағы мүгедек, келесі жылдан бастап үшінші топқа өтеді. Бас сүйегі сынған. Сондай-ақ, оң көзінің көру қабілеті толықтай жоғалған. Бұрын балабақшада тәрбиеші болып істеген әйел жұмыс істеу қабілетінен де айырылды. Десе де желтоқсан айында ақша жетпей, отбасын асырау үшін қызметіне оралған.
Қылмыс бойынша ҚК-тің 106-бап 1-бөлігі Денсаулыққа қасақана ауыр зиян келтірумен тергеу жүріп жатыр.
Қыздың туыстары тиранды заң бойынша қатаң жазалауын талап етіп отыр. Қылмыскер қазанда Талғардағы психикалық ауруханаға жатқызылды.
