Павлодар облысындағы ауылда 80-нен астам қой қырылды. Ұсақ малға жабайы иттер шабуылдаған. Бұл туралы Stan.kz ақпараттық агенттігі хабарлайды.

Әлеуметтік желіде Павлодар ауданы Кемеңгер ауылында малдардың қырылған видеосы тарады. Ветеринарлар бұл жағдайды тексеру үшін оқиға орнына барған. 

29 шілдеде түнде Кемеңгер ауылында ұсақ қара мал, атап айтқанда 83 қой қырылды. Жабайы иттер 15 қойды кеміріп тастады, ал қалған малдар қорыққаннан тапталып мертікті,

дейді Павлодар облыстық ветеринариялық станциясы басшысының міндетін атқарушы Ержан Ахметов.

Оның сөзінше, ветеринариялық станцияның қызметкерлері екі жабайы итті ұстады. Олар 10 күн бақылауда болады. 

Қырылған малдан зерттеуге материалдар алынды. Иттердің құттыру белгілері расталса, утилизация мәселесі қарастырылады,

деп мәлімдеді ветеринариялық станциясы басшысының міндетін атқарушы.

Аталған факт бойынша облыстық полиция департаменті облыстық ветеринарлық инспекциямен бірге тексеріс жұмыстарын бастады, себептері анықталып жатыр.