Мемлекет басшысы Қасым-Жомарт Тоқаев Алматы облысына жұмыс сапары барысында Ресейден кеткен компаниялардың қоныс аударуы жөнінде айтты. Бұл туралы президенттің баспасөз қызметі хабарлады.
Қазіргі уақытта Қазақстанға Ресейден 50-ден аса халықаралық компания көшті. Оның бәрін ірі қалаларда шоғырландыру тиімсіз. Әкімдік Алматы маңында ҮАААЖ периметрі бойынша мұндай өндірістерді орналастыруды пысықтауы керек, бұл өңірдің дамуына айтарлықтай септігін тигізеді. Үкіметпен және компаниялармен осы мәселені талқылаңыздар
— деді Қасым-Жомарт Тоқаев
Сонымен бірге президент шетел инвесторларына барлыұ жағдайды жасауымыз қажет екенін айтты.
Біз инвесторларға жаңа өндіріс орындарын ашуға, оның ішінде басқа елдерден қоныс аударатындарға да барлық жағдайды жасауымыз керек. Шетелдік әріптестермен кедергісіз және үзіліссіз сауданы қамтамасыз ету үшін бұл мәселені қазірден бастап пысықтау қажет.
Облыста бірқатар ірі экспорттаушы кәсіпорындар жұмыс істейді, олардан негізгі салық түсімдері түседі. Біз оларға мемлекеттік қолдау шараларын көрсету арқылы өндірісін кеңейтуге көмектесуіміз керек. Ұлттық экономика және қаржы министрліктері бір ай ішінде ұсыныстарын енгізуі керек.
— деді президент.
