Қасым-Жомарт Тоқаев Павлодар облысындағы жұртшылықпен кездесуінде ұлттық мәдениетті шетелде танытып жүрген өңір азаматтары туралы айтты. Бұл туралы Ақорда хабарлады.

Президенттің айтуынша, елдің күші адамдарда, олардың қайратында, білімінде және патриоттығында жатыр. Сондықтан адамгершілік мемлекеттік саясаттың негізгі өлшеміне айналды.

Мемлекет басшысы қарапайым халықтың мүддесіне, елдің әлемдік ауқымда тартымды жаңа келбетін қалыптастыруға ерекше көңіл бөлу керек екенін айтты.

Ұлттық мәдениетті шетелде дамытып, жаңғыртуға Павлодар облысынан шыққан жаңа қазақ «мәдени толқынының» өкілдері орасан зор үлес қосып жатыр. Классикалық өнердің білгірлері Еуропаның үздік опера сахналарында арияларды орындайтын Мария Мудряктың дауысынан ләззат алады. Грэмми сыйлығының иегері Иманбек Зейкеновтің танымал музыкасы бүкіл әлем жастары арасында ыстық ықыласқа ие,

деді Қасым-Жомарт Тоқаев.

Мемлекет басшысы бұл азаматтар өз ұрпағының дарынды өкілі ретінде мәдениетіміздің шетелдегі табысты елшілеріне айналғанын айтты.

Айта кетейік, мемлекет басшысы қазір Павлодар облысында іссапарда жүр. Ол Үкіметке Павлодар облысын таза сумен қамту үшін қаржы бөлуді тапсырды.

Оған қоса, Үкімет жыл соңына дейін «Павлодар – Астана» бағытындағы тұрақты әуе қатынасын қалпына келтіруі керек екенін айтты.

Кезедсуде президент қазақ қоғамы масылдық психологиядан арылып, адал еңбек етуі керек екеніне тоқталды.