Мемлекет басшысы қазір Павлодар облысында ісссапарда жүр. Бұл туралы Ақорда хабарлады.
Қасым-Жомарт Тоқаев Павлодар облысы жұртшылығымен кездесуде өңірдегі суармалы жер алқабы мен таза ауыз су мәселесін қозғады.
Павлодар өңірі үшін Ертістің орасан зор маңызы бар. Бұл өзен – осы өлкенің тұрғындары, кәсіпорындары және ауыл шаруашылығы үшін негізгі тіршілік көзі. Кейінгі 3 жылда облыста суармалы жердің көлемі 1,5 есе артты. Алдағы уақытта оны тағы 2 есеге, яғни, 300 мың гектарға дейін ұлғайту қажет. Облыс әкімдігі осы мәселеге баса назар аударуға тиіс,
деді мемлекет басшысы.
Президент Үкіметке өңірдің суармалы алқаптарына бөлінетін қаржыны көбейтуді тапсырды. Бұл азық-түлік қауіпсіздігі тұрғысынан ғана емес, халықты жұмыспен қамту үшін де өте маңызды. Судың тапшылығы экономиканы дамытуға кедергі келтіреді. Сондықтан, Ертістің суын тиімді, үнемді пайдалануға айрықша мән берілуі керек.
Мемлекет басшысы өңірді таза ауызсумен қамту үшін Үкіметке қаржы бөлуді тапсырды.
Үш жылда ауылдағы ағайынды таза сумен қамту көрсеткіші 55-тен 94 пайызға дейін өсті. Биыл аймақта осындай 19 жоба жүзеге асырылып жатыр. Әкімдік келесі жылы құны 14 миллиард теңге болатын тағы 39 жобаны қолға алуды ұсынып отыр. Осыған орай, Үкіметке қаржы бөлуді тапсырамын,
деді президент.
Қасым-Жомарт Тоқаев былтырғы жолдауында 5 жыл ішінде қалалар мен ауылдарды 100 процент сумен қамтамасыз етуді тапсырғанын еске салды. Үкімет осы міндеттің орындалуын ерекше бақылауға алуы керек екенін айтып өтті.